DilSeDilTak.co.in

Shayari, SMS, Quotes, Jokes And More....

Nida Fazli Bollywood Sonsg Lyrics

Nida Fazli – Mohabbat mein wafadari se bachiye

Mohabbat mein wafadari se bachiye
Jahan tak ho adakari se bachiye

Har ek soorat bhali lagti hai kuch din
Lahoo ki shobda-kaari se bachiye

Sharafat aadmiyat dard mandi
Bade shehron mein beemaari se bachiye

Zaroori kya har ek mehfil mein aana
Takalluf ki rawadaari se bachiye

Bina pairon ke sar chalte nahi hain
Buzurgon ki samajhdaari se bachiye

Updated: May 16, 2015 — 11:51 am

Nida Fazli – Munh ki baat sune har koi

Munh ki baat sune har koi
Dil ke dard ko jaane kaun
Aawazo’n ke baazaro’n me
Khaamoshi pahachane kaun

Sadiyo’n-Sadiyo’n wahi tamaasha
Rasta-Rasta lambi khoj
Lekin jab hum mil jaate hai
Kho jaata hai jaane kaun

Jane Kya-Kya bol raha tha
Sarhad,pyar kitabe,khoon
Kal meri neendo’n me chhupkar
jaag raha tha jaane kaun

Main uski parchhai hoo’n ya
Wo mera aaina hai
Mere hi ghar me rahta hai
Mere jaisa jaane kaun

Kiran-Kiran alsaata sooraj
Palak-Palak Khulti neende’n
Dheeme-Dheeme bikhar raha hai
Jarra-Jarra jaane kaun


Advertisements
loading...
Updated: May 16, 2015 — 11:51 am

Nida Fazli – Aankhon ka jaam likho julf ki barsat likho

Aankhon ka jaam likho julf ki barsat likho
Jis se naraz ho us shakhs ki har baat likho

Jisse milkar bhi na milne ki kasak baaki hai
Usi anjaan shahanshah ki mulakat likho

Jism maszid ki tarah aankhe namazon jaisi
Jab gunahon me ibaadat thi wo din raat likho

Is kahani ka to anzaam wahi hai jo tha
Tum jo chaaho to mohabbat ki shuruaat likho

Jab bhi dekho use apni nazar se dekho
Koi kuchh bhi kahe tum apne khyaalat likho

Updated: May 16, 2015 — 11:51 am

Nida Fazli – Kahi kahi se har chehara tum jaisa lagta hai

Advertisements

Kahi kahi se har chehara tum jaisa lagta hai
Tumko bhool na paaenge hum aesa lagta hai

Aesa bhi ek rang hai jo karta hai baate bhi
Jo bhi isko pahan le wo apna sa lagta hai

Tum kya bichhade bhool gaye rishto ki sharafat hum
Jo bhi milta hai kuchh din hi achchha lagta hai

Ab bhi yoo milte hai humse phool chmeli ke
Jaise inse apna koi rishta lagta hai

Aur to sab kuchh thik hai lekin kabhi kabhi yoon hi
Chalta firta shahar achaanak tanha lagta hai

Updated: May 16, 2015 — 11:51 am

Nida Fazli – Har ghadi khud se uljhana hai muqaddar mera

Advertisements
Loading...

Har ghadi khud se uljhana hai muqaddar mera
Main hii kasti hoo’n mujhi me hai samandar mera

Kisse poochhoo’n ki kaha’n gum hoo’n barso’n se
Har jagah dhundhata firta hai mujhe ghar mera

Ek se ho gaye hai mausmo’n ke chehare saare
Meri aankho’n se kahi’n kho gaya hai manzar mera

Muddate’n beet gai khwaab suhana dekhe
Jaagta rahta hai har neend me bistar mera

Aaina dekh ke nikla tha main ghar se baahar
Aaj tak haath me mahfooj hai patthar mera

Updated: May 16, 2015 — 11:51 am

Nida Fazli – Garaj baras pyaasi dharti par phir paani de maula

Garaj baras pyaasi dharti par phir paani de maula
Chidiyon ko dana bachhon ko guddhani de maula

Do aur do ka jod hamesha chaar kahan hota hai
Soch samajh waalon ko thodi naadani de maula

Phir roshan kar zaher ka pyaala chamkaa nayee saliben
Jhoothon ki duniya mein sach ko taabaani de maula

Phir moorat se baahar aakar chaaro or bikhar ja
Phir mandir ko koi meera deewani de maula

Tere hote koi kisi ki jaan ka dushman kyon ho
Jeene waalon ko marne ki aasani de maula

Updated: May 16, 2015 — 11:51 am

Nida Fazli – Besan ki sondhi roti par, Khatti chatni jaisi maa

Advertisements

Besan ki sondhi roti par, Khatti chatni jaisi maa
Yaad aati hai chauka, baasan, Chimta, phoonkni jaisi maa

Baans ki khurri khat ke oopar, Har aahat par kaan dhare
Aadhi soi aadhi jaagi, Thaki dopahari jaisi maa

Chidiyon ke chahkar mein gunje, Raadha- mohan ali – ali
Murge ki aawaz se khulti, Ghar ki kundi jaisi maa

Biwi, beti, behan, padosan Thodi thodi si sab mein
Din bhar ik rassi ke oopar, Chalti natni jaisi maa

Baant ke apna chehra, maatha, Aankhen jaane kahan gai
Phate puraane ik album mein Chanchal ladaki jaisi maa

Updated: May 16, 2015 — 11:51 am

Nida Fazli – Baat kam kije jahanat ko chhipate rahiye

Baat kam kije jahanat ko chhipate rahiye
Ajnabi shehar hai ye, dost banate rahiye

Dushmani lakh sahi, khatam na kije rishta
Dil mile na mile, haath milate rahiye

Ye to chehare ki shabahat hui tasvir nahi
Is pe kuch rang abhi aur chadhate rahiye

Gam hain awara akele me bhatak jata hain
Jis jagah bhi rahiye, milte milate rahiye

Jane kab chand bikhar jaye ghane jungle me
Ghar ki chaukhat pe koi deep jalate rahiye

Updated: May 16, 2015 — 11:51 am

Nida Fazli – Har taraf har jagah beshumaar aadmi

Har taraf har jagah beshumaar aadmi
Phir bhi tanhaaiyon ka shikaar aadmi

Subah se shaam tak bojh dhota hua
Apni hi laash ka khud mazaar aadami

Har taraf bhaagte daudte raaste
Har taraf aadami ka shikaar aadami

Roz jita hua roz marta hua
Har naye din naya intazaar aadami

Zindagi ka muqaddar safar dar safar
Aakhiri saans tak beqaraar aadmi

Updated: May 16, 2015 — 11:51 am

Nida Fazli – Apna gham le ke kahin aur na jaaya jaaye

Apna gham le ke kahin aur na jaaya jaaye
Ghar mein bikhri hui cheezon ko sajaaya jaaye

Jin chiragon ko hawaon ka koi khauf nahin
Un chiragon ko hawaon se bachaya jaaye

Baag mein jaane ke aadaab hua karte hain
Kisi titlee ko na phoolon se udaaya jaaye

Khudkhushi karne kii himmat nahi hoti sab me
Aur kuchh din yun hi auron ko sataayaa jaaye

Ghar se masjid hai bahut door chalo yun kar le
Kisi rote huye bachche ko hansaya jaaye

Updated: May 16, 2015 — 11:51 am

Nida Fazli – Main roya pardes mein, bheegaa maan kaa pyaar

Main roya pardes mein, bheegaa maan kaa pyaar
dukh ne dukh se baat ki, bin chithhi bin taar

Chhotaa kar ke dekhiye jeevan kaa vistaar
aankhon bhar aakaash hai, baahon bhar sansaar

Leke tan ke naap ko, ghoome basti gaanv
har chaadar ke gher se, baahar nikalay paanv

Sab ki poojaa ek si, alag alag hai reet
masjid jaaye maulavi, koyal gaaye geet

Pooja ghar mein murati Meera ke sang Shyam,
jiski jitni chaakari utne uske daam

Nadiyaa seenchay khet ko, tota kutaray aam
sooraj thekedaar saa, sab ko baantay kaam

Saaton din bhagawaan ke, kyaa mangal kyaa peer
jis din soye der tak, bhookhaa rahay fakir

Achhi sangat baithkar, sangi badalay roop
jaisay milkar aam se meethii ho gayi dhoop

Sapnaa jharnaa neend kaa, jaagii aankhen pyaas
paanaa, khonaa, khojanaa saanson kaa itihaas

Chaahay Geetaa baanchiye, yaa padhiye Quraan
mera tera pyaar hi har pustak kaa gyaan

Updated: May 16, 2015 — 11:51 am
loading...
Loading...
Loading...
DilSeDilTak.co.in © 2015