DilSeDilTak.co.in

Shayari, SMS, Quotes, Jokes And More....

Loading...

Tag: Wasim Barelvi Shairi

Usulon pe jahan aanch aaye takarana zaruri hai – Shayari By Wasim Barelvi

usulon pe jahan aanch aaye takarana zaruri hai
jo zinda hon to phir zinda nazar aana zaruri hai
nai umron ke khudmukhtariyon ko kon samajhaye
kahan se bach ke chalana hai kahan jana zaruri hai
thake hare parinde jab basere ke liye laute
saliqamand shakhon ka lachak jana zaruri hai
bahut bebak aankhon mein ta’alluq tik nahi pata
muhabbat mein kashish rakhane ko sharmana zaruri hai
saliqa hi nahi shayad use mahasus karne ka
jo kehta hai khuda hai to nazar aana zaruri hai
mere honton pe apni pyas rakh do aur phir socho
ki is ke bad bhi duniya mein kuch pana zaruri hai

Updated: January 28, 2015 — 3:30 pm

Ghazal By Wasim Barelvi – Apne har ek lafz ka khud aainaa ho jaaunga

Apne har ek lafz ka khud aainaa ho jaaunga
Us ko chhota keh ke mein kaise bada ho jaaunga

Tum girane mein lage the tum ne socha hi nahin
Mein gira to mas’ala bankar khada ho jaaunga

Mujh ko chalne do, akela hai abhi mera safar
Raasta roka gayaa to qafila ho jaaunga

Sari duniya ki nazar mein hai mera ahd-e-wafa
Ek tere kehne se kya main be-wafa ho jaaunga?




Updated: January 28, 2015 — 3:29 pm

Mein is ummid pe dooba ke tu bacha lega – Urdu Shayari by Waseem Barelvi

Loading...


Mein is ummid pe dooba ke tu bacha lega
Ab is ke baad mera imtehaan kya lega

Ye ek mela hai, wada kisi se kya lega
Dhalega din to har ek apna rasta lega

Mein bujh gaya to hamensha ko bujh hi jaunga
Koi charagh nahin hun jo phir jalaa lega

Kaleja chahiye dushman se dushmani ke liye
Jo be-amal ho wo badla kisi se kya lega

Hzaar tod ke aa-jaaun usse rishta “Waseem”
Mein jaanta hun, wo jab chahega bula lega

Updated: January 28, 2015 — 3:29 pm

Ghazal By Urdu Poet Waseem Barelvi – Mujhe bujhaa de

Mujhe bujhaa de, meraa dard mukhtasar* kar de
Magar diye ki tarah mujh ko mo’atbar* kar de

mukhtasar : Kam (shorten), mo’atbar : bharose ke laiq (trustworthy)

Meri talaash ko be-naam-o-be-safar kar de
Main teraa raastaa chhoruuN to dar-ba-dar kar de

Judaaiyon ki ye raaten to kaatni hongi
Kahaaniyon ko koi kaise mukhtasar kar de

Tere khayaal ke haathon kuch aisaa bikhraa hun
Ke jaise bachchaa kitaaben idhar-udhar kar de

Updated: January 28, 2015 — 3:28 pm

Urdu Shayari – Mujh Tak Mere Hisse Ki Dhoop Aane De

Apne saaye ko itna samjhaane de
Mujh tak mere hisse ki dhoop aane de

Ek nazar mein kai zamane dekhe to
Budhi aankhon ki tasveer banane de

Baba duniya jeet ke mein dikhla dunga
Apni nazar se door to mujh ko jaane de

Phir to ye uncha hi hota jaayega
Bachpan ke hathon mein chaand aajaane de

Faslen pak jaye to khet se bichhde gi
Roti aankh ko pyar kahan samjhane de

Mein bhi to is bagh ka ek parinda dun
Meri bhi aawaaz mein mujh ko gaane de




Updated: January 28, 2015 — 3:28 pm

Wasim Barelvi Shayari – Wo mere ghar nahin aata

Wo mere ghar nahin aata, Mein us ke ghar nahin jaata
Magar in ehtiyatoN se, T’alluq mar nahin jaata

Bure achchhe ho jaise bhi ho, Sab rishte yahan ke hain
Kisi ko saath duniya se, Koi lekar nahin jaata

Gharon ki tarbiyat kya aagai TV ke haaton mein
Koi bachcha ab apne baap ke upar nahin jaata

Khule the sheher mein so dar, Magar ek had ke andar hi
Kahan jaata agar mein, Laut ke phir ghar nahin jaata

Muhabbat ke ye aansoo hain, Inhen aankhon me rehne do
Shareefon ke gharon ka, Mas’ala bahar nahin jaata

Updated: January 28, 2015 — 3:28 pm

Wasim Barelvi Shayri – Muhabbat mein buri niyyat se kuchh socha nahin jaata

Muhabbat mein buri niyyat se kuchh socha nahin jaata
Kaha jaata hai us ko be-wafaa, samjha nahin jaata

Jhukata hai ye sar jis ki ibadat ke liye us tak
Tera jazba to jaata hai tera sajda nahin jaata

Tumhare saath mein koi nayapan hai to bas ye hai
Bohot takleef deta hai, magar chhoraa nahin jaata

Updated: January 28, 2015 — 3:28 pm
Page 1 of 212
Loading...
DilSeDilTak.co.in © 2015